बैशाख-२३ बुधबार
अनिश शाह
नेपालगन्ज उपमहानगरपालिका–४ स्थित कब्रस्तान (चिहान) व्यवस्थापनमा लामो समयदेखि भइरहेको भनिएको अनियमितता तथा आर्थिक हिनामिनाको विषय पुनः गम्भीर बनेको छ। सम्बन्धित मुद्दा जिल्ला प्रशासन कार्यालय, बाँकेमा प्रक्रियामै रहेको अवस्थामा समेत नियमविपरीत गतिविधि जारी रहेको भन्दै स्थानीयस्तरमा तीव्र असन्तोष देखिएको छ।
प्राप्त जानकारीअनुसार, प्रशासनले मुद्दा टुंगो नलागेसम्म कुनै पनि नयाँ निर्माण कार्य नगर्न स्पष्ट रोक लगाएको थियो। तर उक्त निर्देशनको उल्लंघन गर्दै केही व्यक्तिहरूले राजनीतिक पहुँचको आडमा निर्माण तथा आर्थिक क्रियाकलाप सञ्चालन गरिरहेको आरोप लागेको छ।
स्थानीय स्रोतहरूका अनुसार, विभिन्न राजनीतिक दलसँग आवद्ध केही व्यक्तिहरूले प्रभाव प्रयोग गरी कब्रस्तान क्षेत्रलाई व्यक्तिगत स्वार्थपूर्तिको माध्यम बनाएको दाबी गरिएको छ। यस्तै, यस प्रकरणमा संलग्न भनिएका केही व्यक्तिहरूविरुद्ध पक्राउ पुर्जी समेत जारी भइसकेको बताइन्छ। सोही क्रममा नेपालगन्ज वडा प्रहरी कार्यालय नजिकै बसोबास गर्ने सबान हल्वाई (सबान बाबा) को नाममा पनि पक्राउ आदेश जारी भएको उल्लेख गरिएको छ।
यद्यपि, यस्ता प्रमाण तथा कानुनी प्रक्रिया अगाडि बढिसक्दा पनि अपेक्षित कारबाही हुन नसक्नुले जिल्ला प्रशासन कार्यालयमाथि राजनीतिक दबाब परेको आशंका स्थानीयले व्यक्त गरेका छन्। कानुनी राज्यको सिद्धान्तविपरीत प्रभाव र पहुँचका आधारमा मुद्दा प्रभावित पार्ने प्रयास भएको भन्दै सरोकारवालाहरूले गम्भीर चिन्ता व्यक्त गरेका छन्।
कानुन बमोजिम सार्वजनिक सम्पत्ति तथा धार्मिक स्थलको संरक्षण गर्नु राज्यको दायित्व भएको उल्लेख गर्दै स्थानीय मुस्लिम समुदायले निष्पक्ष छानबिन र दोषीमाथि कडा कारबाहीको माग गरेका छन्। साथै, उनीहरूले न्यायका लागि सम्बन्धित निकायहरूसँग पुनः आग्रह गर्दै अब प्रभावकारी कदम चाल्नुपर्ने आवश्यकता औंल्याएका छन्।
यस घटनाले राज्य संयन्त्रको पारदर्शिता, उत्तरदायित्व र विधिको शासनमाथि नै प्रश्न उठाएको छ।
