अनिश शाह
नेपालगन्ज- २७ फगुन
बाँके जिल्लामा रहेको गोल्डेन एबीसी स्कुलका प्रबन्ध निर्देशक विकास बहादुर सिंहले पवित्र रमजान महिनाको २१औँ रोजाको अवसर पारेर विशेष इफ्तार पार्टीको आयोजना गर्नुभएको छ।
उक्त कार्यक्रममा मुस्लिम समुदायका अगुवा, बुद्धिजीवी तथा स्थानीय व्यक्तित्वहरूको उल्लेखनीय सहभागिता रहेको थियो।
पवित्र रमजान महिनामा आयोजना गरिएको यस इफ्तार कार्यक्रममा सहभागीहरूले आपसी सद्भाव, धार्मिक सहिष्णुता र सामाजिक एकताको सन्देश आदान–प्रदान गरेका थिए। विभिन्न धर्म, संस्कृति र समुदायबीच भाइचाराको सम्बन्ध अझ मजबुत बनाउने उद्देश्यले आयोजना गरिएको यो कार्यक्रमलाई सबैले सकारात्मक रूपमा लिएका छन्।
यस अवसरमा मुस्लिम समुदायका प्रतिनिधिहरूले गोल्डेन एबीसी स्कुलका प्रबन्ध निर्देशक विकास बहादुर सिंहप्रति हार्दिक धन्यवाद तथा आभार व्यक्त गरेका छन्। समुदायका अनुसार यस्तो कार्यक्रमले समाजमा सहिष्णुता, सम्मान र आपसी समझदारीलाई थप बलियो बनाउने विश्वास गरिएको छ।
मुस्लिम समुदायले विकास बहादुर सिंहले देखाउनुभएको सद्भाव, सहकार्य र सामाजिक एकताको भावनाको उच्च प्रशंसा गर्दै भविष्यमा पनि यस्ता कार्यक्रमहरू निरन्तर आयोजना हुँदै जाने अपेक्षा व्यक्त गरेको छ। साथै, यस्ता गतिविधिले समाजमा मेलमिलाप, सहअस्तित्व र पारस्परिक सम्मानको संस्कारलाई अझ सुदृढ बनाउने विश्वास व्यक्त गरिएको छ।
