बाँके । डुडुवा गाउँपालिका वडा नं. २, बेतहानीमा बाँके क्षेत्र नं. २ प्रतिनिधि सभा सदस्य पदका उम्मेदवार दिपेन्द्र बिष्ट नेतृत्वमा नेपाली कम्युनिस्ट पार्टी (नेकपा)को घरदैलो अभियान सम्पन्न भएको छ।
घरदैलो अभियानको क्रममा उम्मेदवार बिष्टले स्थानीय बासिन्दासँग प्रत्यक्ष भेटघाट गर्दै जनताको सुझाव र समस्या संकलन गर्नुभयो। कृषि, सडक, खानेपानी, स्वास्थ्य, शिक्षा र युवालाई रोजगारी उपलब्ध गराउने विषयमा जनताको माग सुनेर उहाँले ती सबै प्राथमिकताका रूपमा सम्बोधन गर्ने प्रतिबद्धता व्यक्त गर्नुभयो।
कार्यक्रममा डिल्ली बराल (अमिर) ले भन्नुबयो, “डुडुवा–२ को विकास र समृद्धि जनतासँग प्रत्यक्ष संवादबाट मात्र सम्भव छ। हामी यहाँको जनताको आवाज सुन्न र समाधानमा पहल गर्न आएका छौं।”
समानुपातिक उम्मेदवार कालिमिया कस्मिरा र जामिया खातुनले पनि स्थानीय बासिन्दासँग प्रत्यक्ष संवाद गर्दै युवाहरूलाई शिक्षित, अनुशासित र सक्रिय नागरिक बन्न प्रेरित गर्ने उद्देश्य राखेका थिए।
बेतहानीमा देखिएको उत्साह र सहभागिताले उम्मेदवार बिष्टको चुनावी अभियानमा सकारात्मक ऊर्जा थपेको विश्लेषकहरू बताउँछन्। महिलाहरू, युवाहरू र ज्येष्ठ नागरिकहरूको सक्रिय उपस्थितिले अभियानलाई अझ जीवित बनाएको थियो।
उम्मेदवार बिष्टले भन्नुभयो, “बेतहानीका हरेक घरका सुझाव र माग मेरो प्राथमिकतामा पर्नेछन्। हामी केवल प्रचारका लागि होइन, काम गरेर देखाउने नेतृत्वको पक्षमा छौं।”
यसरी डुडुवा–२ मा सम्पन्न घरदैलो अभियानले नेकपा टोलीको जनमत जुटाउने प्रयासलाई थप सशक्त बनाएको छ र चुनावी प्रतिस्पर्धामा बिष्टको पृष्ठभूमि अझ बलियो भएको संकेत दिएको छ।
सो कार्यक्रममा लुम्बिनी प्रदेश सचिवालय सदस्य डिल्ली बराल (अमिर), समानुपातिक उम्मेदवार कालिमिया कस्मिरा, जामिया खातुन लगायतका नेता–कार्यकर्ताहरूको सहभागिता रहेको थियो।
